భారత్ సమాచార్, రాజకీయం ; తెలంగాణ రాష్ట్ర సాధనే ధ్యేయంగా, ప్రధాన ఎజెండాగా ఏర్పాటు అయిన స్థానిక రాజకీయ పార్టీ టీఆర్ఎస్ (తెలంగాణ రాష్ట్ర సమితి). 2001వ సంవత్సరం ఏఫ్రిల్ 27వ తేదీన టీఆర్ఎస్ పార్టీని ఏర్పాటు చేశారు పార్టీ వ్యవస్థాపక అధ్యుక్షుడు, గులాబీ అధినేత కేసీఆర్. తెలంగాణ కొత్త రాష్ట్రంగా ఏర్పడిన తర్వాత వరుసగా రెండు సార్లు టీఆర్ఎస్ ను అధికారంలో తీసుకొచ్చారు గులాబీ బాస్ కేసీఆర్. రాష్ట్ర రాజకీయాల నుంచి దేశ రాజకీయాల వైపు మళ్లించడానికి తెలంగాణ రాష్ట్ర సమితి పార్టీ పేరును 2022 అక్టోబర్ 5వ తేదీన భారత రాష్ట్ర సమితి గా మార్చారు. నేడు బీఆర్ఎస్ పార్టీ 23 వసంతాలను పూర్తి చేసుకొని 24వ ఏడాదిలోకి అడుగుపెడుతోంది. ఈ సందర్భంగా అన్ని జిల్లాలలోని బీఆర్ఎస్ పార్టీ ఆఫీసులలో ఆవిర్భావ దినోత్సవ వేడుకలను ఘనంగా నిర్వహించాలని పార్టీ వర్కింగ్ ప్రెసిడెంట్ కేటీఆర్, మాజీ మంత్రి హరీష్ రావు పిలుపునిచ్చారు. బీఆర్ఎస్ పార్టీ కార్యకర్తలకు, నాయకులను, ప్రజలకు ఆవిర్భావ దినోత్సవ శుభాకాంక్షలు తెలుపుతూ కేటీఆర్ సోషల్ మీడియా ఎక్స్ (ట్విట్టర్) లో ట్వీట్ చేశారు. దాదాపుగా అన్ని జిల్లాల పార్టీ ఆఫీసుల్లో జిల్లా పార్టీ అధ్యక్షులు, నాయకులు, కార్యకర్తల సమక్షంలో పార్టీ జెండాను ఆవిష్కరించి వేడుకలు జరుపుతున్నారు.
రెపరెపలాడే గులాబీ పతాకం
తెలంగాణ ఎగరేసిన జయ కేతనం..!
పర పీడన చెర విడిపించిన ఉద్యమ జెండా ..!
పసిడి కాంతులు పంచిన ఉజ్వల ప్రగతి బావుటా..!
పుట్టుకే ఒక సంచలనం..
దారి పొడవునా రాజీలేని రణం..!
ఆత్మగౌరవ మెరుపులు..అభివృద్ధి పరిమళాలు అద్దుకున్న ..స్వీయ రాజకీయ అస్తిత్వ చైతన్యం..!
జలదృశ్యంలో ఉదయించి..ఉర్రూతలూగించే ఉద్యమ దృశ్యాలను ఆవిష్కరించి..
స్వరాష్ట్రం సాధించి.. సస్యశ్యామల సన్నివేశాలను సృష్టించి ..గమ్యాలను ముద్దాడిన గమనం…!
అమేయం..అజేయం..అనితర సాధ్యం
గులాబీ పరివర్తన ప్రస్థానం..!
ముళ్లూ రాళ్లూ అవాంతరాలను అధిగమిస్తూ..
పరవళ్లు తొక్కిన పయనం..!
చావునోట్లో తలబెట్టి సాహసంగా పోరాడిన దళపతి..!
లాఠీలకు..జైళ్లకు వెరవక కొట్లాడిన గులాబీ సైనికుల త్యాగ నిరతి..!
ఆటుపోట్లను చూసి అదిరిపడలేదు…!
ఎదురుదెబ్బలకు బెదిరిపోలేదు..!
గెలిస్తే పొంగిపోలేదు..ఓటములకు కుంగిపోలేదు.!
జయాపజయాలకు అతీతమైన స్థిత ప్రజ్ఞత !
ఆకులురాలే శిశిరంలో..ఆకుపచ్చని వసంతంలోనూ ఒకటే నిబద్ధత..!
వేయి దాడులు..లక్ష కుట్రలు..
విష ప్రచారాలు..విచ్ఛిన్న పన్నాగాలను ఎదిరించి నిలిచిన సత్తా..!
దండి గుండె దళపతి..నెత్తురు మండి ఎత్తిన జెండా !
ఏ పాత్రలో వున్నా జనమే ఎజెండా..!
మొన్నటి పోరాటం..ప్రపంచానికే పాఠం
నిన్నటి పాలన..దేశానికే నయా నమూనా..!
నేడు..ప్రజాపక్షం వహించే సమర్థ ప్రతిపక్షం..!
తెలంగాణ మట్టిలో పుట్టిన ఇంటిపార్టీ..
ఈ నేల మేలుకోరే భూమి పుత్రుల పార్టీ..!
ఇది..పేగు తెంచుకున్న ప్రేమ బంధం..!
సమరంలో..సంబురంలో
కష్ట సుఖాలను కలబోసుకున్న అనుబంధం..!
తెంచలేని తుంచలేని జన్మజన్మాల సంబంధం..!
మనమే తెలంగాణ దళం
మనమే తెలంగాణ గళం
జెండా మోసి..జంగ్ చేసిన లక్షలాది కార్యకర్తలే బలం..బలగం..!
కంటికి రెప్పలా పార్టీని కాపాడుకున్న మీ పట్టుదలకు ..మీ శ్రమకు..
మీ కృషికి..సదా సలాం..!
ఏమిచ్చి తీర్చుకోగలం మీ రుణం..!
భారత రాష్ట్ర సమితి కుటుంబ సభ్యులందరికీ
ఆవిర్భావ దినోత్సవ శుభాకాంక్షలు..!
