భారత్ సమాచార్, టెహ్రాన్: అమెరికా, ఇజ్రాయెల్‌తో కొనసాగుతున్న యుద్ధం నేపథ్యంలో ఇరాన్‌లో భారీ ర్యాలీ నిర్వహించారు. యుద్ధం ప్రారంభమైన తర్వాత దేశంలో జరిగిన అతిపెద్ద ప్రభుత్వ ఆధ్వర్యంలోని ప్రదర్శనగా ఈ ర్యాలీ నిలిచింది. శుక్రవారం టెహ్రాన్‌లో వందలాది వేల మంది ప్రజలు రోడ్లపైకి వచ్చి జాతీయ పతాకాలతో ప్రదర్శనలో పాల్గొన్నారు. దేశ రక్షణ కోసం అవసరమైతే తాము కూడా ముందుకు వస్తామని పలువురు ప్రతిజ్ఞ చేశారు. అమెరికా, ఇజ్రాయెల్‌కు వ్యతిరేకంగా నినాదాలు కూడా వినిపించాయి.
దేశ ఐక్యతను చాటేలా ప్రభుత్వ పిలుపుతో ఈ భారీ కార్యక్రమం నిర్వహించినట్లు నివేదికలు పేర్కొన్నాయి. అమెరికా విధించిన ఆంక్షలు, ఇరాన్ పోర్టులపై నౌకా దిగ్బంధనం వంటి చర్యలతో దేశ ఆర్థిక పరిస్థితిపై ఒత్తిడి పెరుగుతున్న నేపథ్యంలో ఈ ప్రదర్శన జరిగింది. జాతీయ జెండాలు చేతబట్టి ప్రజలు ర్యాలీలో పాల్గొన్నారు. కొందరు స్వచ్ఛందంగా పరిమిత సైనిక శిక్షణ తీసుకుని దేశ రక్షణలో భాగస్వాములు కావడానికి ముందుకు వచ్చారు.
సైనిక దుస్తులు ధరించిన స్వచ్ఛంద కార్యకర్తలు కూడా ర్యాలీలో పాల్గొన్నారు. వీరికి పరిమిత సైనిక శిక్షణ ఇవ్వనున్నట్లు ఇరాన్ ప్రభుత్వ వర్గాలు తెలిపాయి. ఈ స్వచ్ఛంద బృందాలు ఇప్పటికే ఉన్న ఇస్లామిక్ రివల్యూషనరీ గార్డ్ కార్ప్స్, బసీజ్ బలగాలకు అదనపు భద్రతా పొరగా పనిచేసేలా ఏర్పాట్లు చేస్తున్నట్లు అంతర్జాతీయ మీడియా నివేదికలు పేర్కొన్నాయి.
టెహ్రాన్ రివల్యూషనరీ గార్డ్ కమాండర్ జనరల్ హసన్ హసన్‌జాదెహ్ తెలిపిన వివరాల ప్రకారం.. 6 లక్షల మందికి పైగా ప్రజలు పరిమిత సైనిక శిక్షణ కోసం నమోదు చేసుకున్నారు. శిక్షణలో పాల్గొనే వారి సంఖ్య 10 లక్షలకు పైగా చేరుతుందని ఆయన వెల్లడించారు. అయితే శుక్రవారం ఉదయం టెహ్రాన్‌లో జరిగిన ర్యాలీలో 3 లక్షల మందికి పైగా ప్రజలు పాల్గొన్నట్లు ఇరాన్ ప్రభుత్వ ప్రసార సంస్థ అంచనా వేసింది.
ర్యాలీలో ఇరాన్ సైనిక సామర్థ్యాన్ని ప్రదర్శించేలా డ్రోన్లు, ఇతర సైనిక పరికరాలను కూడా ప్రదర్శించారు. అధ్యక్షుడు మసూద్ పెజెష్కియన్‌తో పాటు సైనిక, భద్రతా ఉన్నతాధికారులు ఈ కార్యక్రమాన్ని వీక్షించారు. బసీజ్ దళాల కొత్త అధిపతి హొస్సేన్ తాయెబ్ మాట్లాడుతూ స్వచ్ఛంద కార్యకర్తలు దేశ రక్షణకు సిద్ధంగా ఉంటారని తెలిపారు. ఇదే తరహా కార్యక్రమాలను ఇతర నగరాల్లోనూ నిర్వహించనున్నట్లు ప్రకటించారు.
ఈ ర్యాలీ ద్వారా యుద్ధ పరిస్థితుల్లో జాతీయ ఐక్యతను, ప్రజల మద్దతును ప్రదర్శించేందుకు ఇరాన్ ప్రభుత్వం ప్రయత్నించినట్లు అంతర్జాతీయ వార్తా సంస్థలు విశ్లేషించాయి. మరోవైపు, అమెరికా ఆంక్షలు, పోర్టులపై దిగ్బంధనం కారణంగా ఇరాన్ ఆర్థిక వ్యవస్థపై ఒత్తిడి కొనసాగుతున్నట్లు నివేదికలు పేర్కొన్నాయి.