భారత్ సమాచార్, మెదక్ జిల్లా: జిల్లాలో పెండింగ్‌లో ఉన్న కేసుల దర్యాప్తును వేగవంతం చేసి, నిర్ణీత గడువులోగా పూర్తి చేయాలని మెదక్ జిల్లా SP డి.వి. శ్రీనివాసరావు పోలీసు అధికారులను ఆదేశించారు. కేసులను ఎక్కువకాలం పెండింగ్‌లో ఉంచకుండా, సకాలంలో దర్యాప్తు పూర్తి చేసి చార్జ్‌షీట్లు దాఖలు చేయాలని స్పష్టం చేశారు. జిల్లా పోలీసు కార్యాలయంలో మంగళవారం నిర్వహించిన నెలవారీ నేర సమీక్ష సమావేశంలో ఆయన పలు అంశాలపై అధికారులకు దిశానిర్దేశం చేశారు.
కేసుల దర్యాప్తులో వేగం పెంచాలి
సమావేశంలో గ్రేవ్‌, నాన్‌గ్రేవ్‌, మిస్సింగ్‌, ఎన్‌బీడబ్ల్యూ కేసులతో పాటు SC, ST అట్రాసిటీ, POCSO కేసుల దర్యాప్తు పురోగతిని SP సమీక్షించారు. ప్రతి కేసులో నిర్దేశిత గడువును దృష్టిలో ఉంచుకొని దర్యాప్తు చేపట్టాలని సూచించారు. సాక్ష్యాధారాల సేకరణ, సాక్షుల వాంగ్మూలాల నమోదు, ఇతర కీలక అంశాల్లో నిర్లక్ష్యం చేయకుండా కేసులను పటిష్ఠంగా సిద్ధం చేయాలన్నారు.
గ్రేవ్‌ కేసుల్లో సంఘటనా స్థలంలో లభించే ఆధారాలను జాగ్రత్తగా సేకరించి, శాస్త్రీయ, సాంకేతిక ఆధారాల సహాయంతో దర్యాప్తు నిర్వహించాలని తెలిపారు. కేసుకు సంబంధించిన ప్రతి అంశాన్ని క్షుణ్ణంగా పరిశీలించి, న్యాయస్థానంలో బలమైన ఆధారాలు సమర్పించేలా చర్యలు తీసుకోవాలని ఆదేశించారు.
మిస్సింగ్‌, ఎన్‌బీడబ్ల్యూ కేసులపై ప్రత్యేక దృష్టి
మిస్సింగ్‌ కేసుల్లో బాధితుల ఆచూకీ గుర్తించేందుకు అన్ని కోణాల్లో దర్యాప్తు చేపట్టాలని SP సూచించారు. ఎన్‌బీడబ్ల్యూ కేసుల్లో నాన్‌ బెయిలబుల్‌ వారెంట్ల అమలును వేగవంతం చేయాలని ఆదేశించారు. SC, ST అట్రాసిటీ, POCSO కేసుల్లో బాధితులకు సత్వర న్యాయం అందేలా సంబంధిత అధికారులు సమన్వయంతో పనిచేయాలని తెలిపారు.
సీసీ కెమెరాలు, విజిబుల్ పోలీసింగ్‌కు ప్రాధాన్యం
జిల్లాలో నేరాల నియంత్రణకు సీసీ కెమెరాల ఏర్పాటు మరింత పెంచాలని SP సూచించారు. ఇప్పటికే ఏర్పాటు చేసిన కెమెరాలు సక్రమంగా పనిచేస్తున్నాయా లేదా అనే విషయాన్ని ఎప్పటికప్పుడు పర్యవేక్షించాలని చెప్పారు. ప్రజల్లో భద్రతా భావాన్ని పెంపొందించేందుకు ప్రతిరోజూ విజిబుల్ పోలీసింగ్ నిర్వహించాలని, ప్రధాన కూడళ్లు, రద్దీ ప్రాంతాల్లో పోలీసుల నిఘాను మరింత పెంచాలని ఆదేశించారు.
ట్రాఫిక్ రూల్స్ ఉల్లంఘిస్తే చర్యలు
రోడ్డు ప్రమాదాల నివారణకు ట్రాఫిక్ నిబంధనలను కచ్చితంగా అమలు చేయాలని SP స్పష్టం చేశారు. నిబంధనలు ఉల్లంఘించే వారిపై కఠిన చర్యలు తీసుకోవాలని ఆదేశించారు. వాహనదారులు హెల్మెట్‌, సీట్‌బెల్ట్‌ తప్పనిసరిగా వినియోగించేలా అవగాహన కార్యక్రమాలు నిర్వహించాలని సూచించారు. అలాగే ప్రతిరోజూ డ్రంక్‌ అండ్‌ డ్రైవ్‌ తనిఖీలు చేపట్టి, మద్యం సేవించి వాహనాలు నడిపేవారిపై చట్టప్రకారం చర్యలు తీసుకోవాలని తెలిపారు.
ఈ నెలవారీ నేర సమీక్ష సమావేశంలో అదనపు SP విక్రాంత్‌ కుమార్‌ సింగ్‌, DSPలు ప్రసన్న కుమార్‌, నరేందర్‌ గౌడ్‌, సుభాష్‌ చంద్రబోస్‌, CIలు, SIలు, ఇతర పోలీసు సిబ్బంది పాల్గొన్నారు.