భారత్ సమాచార్, రాజకీయం ;
తెలంగాణలో అసెంబ్లీ, సార్వత్రిక ఎన్నికల పోలింగ్ ముగిసిన తర్వాత కూడా అధికార, ప్రతిపక్షాల మధ్య మాటల యుద్ధం కొనసాగుతూనే ఉంది. తాజాగా సీఎం రేవంత్ రెడ్డి రాష్ట్రంలో కరెంటు కోతలకి గత బీఆర్ఎస్ ప్రభత్వ వైఫల్యాలే కారణమని ఆరోపించారు. దానికి సమాధానంగా బీఆర్ఎస్ సీనియర్ నాయకులు, మాజీ మంత్రి హరిష్ రావు ఆడ రాక పాత గజ్జెలు అంటూ సీఎంపై ట్వీట్టర్ (ఎక్స్) వేదికగా సెటైర్ వేశారు.
నిరంతరంగా విద్యుత్ సరఫరా
కరెంట్ కోతల విషయంలో సిఎం రేవంత్ రెడ్డి తన ప్రభుత్వ వైఫల్యాలను అంగీకరించకుండా ప్రతి పక్షాలు, విద్యుత్ ఉద్యోగుల మీద అభాండాలు మోపడాన్ని బీఆర్ఎస్ పార్టీ తరపున తీవ్రంగా ఖండిస్తున్నామని హరిష్ రావు అన్నారు. విద్యుత్ రంగ వైఫల్యాలకు గత ప్రభుత్వంలో నేనే భాద్యుడిని అన్నట్టుగా మాట్లాడటం విడ్డూరంగా ఉందన్నారు. ఆయన వైఖరి ఆడ రాక పాత గజ్జెలు అనే సామెతను గుర్తు చేస్తున్నదని కాంగ్రెస్ ప్రభుత్వాన్ని ఉద్దేశించి సెటైర్ వేశారు. బిఆర్ఎస్ ప్రభుత్వం, 24 గంటల పాటు నిరంతరంగా విద్యుత్ సరఫరా చేసేందుకు.. విద్యుత్ ఉద్యోగుల సహకారంతో పటిష్ఠమైన వ్యవస్థను నిర్మించిందని చెప్పారు. బీఆర్ఎస్ ప్రభుత్వంలో రెప్పపాటు కాలం కూడా కరెంట్ కోతలు లేని ఏకైక రాష్ట్రంగా తెలంగాణను నిలిచిందన్నారు. కేవలం 5 నెలల్లోనే కాంగ్రెస్ ప్రభుత్వం ఆ వ్యవస్థను కుప్ప కూల్చిందని ఆరోపించారు. గృహ, వ్యవసాయ, పారిశ్రామిక అవసరాలకు సరిపోయే విద్యుత్ సరఫరా చేయడంలో పూర్తిగా విఫలమైందని విమర్శించారు.
చిత్తశుద్ధి లేని ముఖ్యమంత్రి
తమ చేతగాని తనాన్ని కప్పిపుచ్చుకునేందుకు, ప్రతిపక్షాలు, విద్యుత్ ఉద్యోగులపై రేవంత్ రెడ్డి నిరాధార ఆరోపణ చేస్తున్నారన్నారు. తెలంగాణ ఉద్యమంలో, తెలంగాణ పున్: నిర్మాణంలో కీలక పాత్ర పోషించిన విద్యుత్ ఉద్యోగులను చీటికి మాటికి నిందించడం, చర్యలు తీసుకోవడం వారి ఆత్మస్థైర్యాన్ని దెబ్బతీయడమేనన్నారు. విద్యుత్ ఉద్యోగుల పై నెపం నెట్టడమే తప్ప కరెంటు కోతలను ఎలా సరిదిద్దాలనే చిత్తశుద్ధి ముఖ్యమంత్రికి లేకపోవడం దురదృష్టకరమని వ్యాఖ్యానించారు. సీఎం ఇలాంటి చిల్లర మల్లర చేష్టలు మాని కేసీఆర్ హయాంలో రెప్ప పాటు కూడా పోని విధంగా 24 గంటల విద్యుత్ ను ఇచ్చినట్టుగా అన్ని రంగాలకు సరఫరా చేస్తే మంచిదన్నారు.
“తన లాగే అందరూ కుట్రలు కుతంత్రాలకు పాల్పడుతారని సీఎం భ్రమల్లో ఉన్నట్టున్నారు. వాటిని వీడి పాలన పై దృష్టి పెడితే మంచిది” అని వ్యాఖ్యానించారు.
