భారత్ సమాచార్,ఆధ్యాత్మికం ;
కలియుగ ప్రత్యక్ష దైవం తిరుమల ఏడు కొండల శ్రీనివాసుడు చెంతకు మెట్ల మార్గం నుంచి వెళ్లాలంటే తిరుపతిలోని‘అలిపిరి’ అనే ప్రాంతం నుంచే వెళ్లాలనే విషయం అందరికి తెలిసిందే. కానీ ఆ ప్రదేశానికి విచిత్రమైన ‘అలిపిరి’ అనే పేరు ఎలా వచ్చిందనే విషయం మాత్రం ఎవ్వరికి తెలీదు. అసలు ” అలిపిరి ” అనే పేరే ఒక విచిత్రమైన పేరు లాగా ఉంటుంది. మన తెలుగుతో పాటు తమిళం, కన్నడ, మలయాళం ఇలా ఏ భాషలోనూ ఈ ” అలిపిరి ” అనే పదం లేదు. అయితే, తిరుపతిలో ” అలిపిరి ” అనే ఈ పదం ఎలా పుట్టింది ? దీని వెనుక ఉన్న చరిత్ర గురించి పూర్తి వివరాలతో తెలుసుకుందాం.
పూర్వం ఐదు వందల సంవత్సరాల క్రితం,” తిరుపతి ” నగరం ఇప్పటిలాగా లేదు. ఇప్పుడు ” అలిపిరి ” అని పిలుస్తున్న ప్రాంతానికి- “అలిపిరి” అన్న పేరు కూడా లేదు. అది ( 1656 – 1668 ) ప్రాంతం. ఢిల్లీలో మొఘల్ చక్రవర్తులు పాలిస్తున్న సమయం. శ్రీ కృష్ణ దేవరాయల అనంతరం జరిగిన ” రాక్షసి తంగడి, తళ్ళికోట ” మొదలైన యుద్ధాల తర్వాత, విజయనగరం రాజుల ప్రాబల్యం బాగా తగ్గింది. అప్పుడు నిజాం నవాబు రాయల సీమ ప్రాంతాన్ని ఆక్రమించాడు. నవాబుల కాలంలో ” ఆలీ ” సైన్యం తిరుపతికి చేరుకుంది. అప్పుడు, తిరుపతి చిన్న గ్రామం. ఇప్పుడు ” మంచినీళ్ళ కుంట ” అని చెప్పుకుంటున్న” నరసింహ తీర్థమే ” అప్పటి తిరుపతి గ్రామం. ఇక్కడ ఒక నరసింహ స్వామి మందిరం ఉంది, దానికి ప్రజలు నిత్యం ధూప, దీప, నైవేద్యాలు సమర్పిస్తుండేవారు. చరిత్ర తెలిసిన పెద్దవారు ఇప్పటికీ దీనిని ” నరసింహ తీర్థం రోడ్ ” అనే పిలుస్తారు.
శ్రీ కృష్ణ దేవరాయలు, భక్తితో స్వామి వారికి సమర్పించుకున్న విలువ కట్టలేనన్ని వజ్రాలు, వైఢూర్యాలు, కనక పుష్యరాగాలు, కెంపులూ , అపారమయిన బంగారం దోచుకెళ్ళి వాళ్ళ ఖజానా నింపుకుందామని నవాబుల పథకం. ఆ బాధ్యతను సైన్యాధికారి ‘ఆలి’కి అప్పగించారు. ఆలి సైన్యం సరిగ్గా ఇప్పుడు ” అలిపిరి ” అని పిలవబడుతున్న ప్రాంతాన్ని చేరుకోగానే, శ్రీ ఆది వరాహ స్వామి అవతారమైన శ్రీవారు వరాహ రూపంలో వచ్చి నిలువరించారు.మొదట కొంచెం బెదిరినా కూడా ముందుకు కదిలాడు. అంతే హఠాత్తుగా ఎవరి ప్రమేయమూ లేకుండా అతని రెండు కళ్ళూ పోయాయి, దృష్టి పోవడంతో దిక్కులేని స్థితిలో ఎంతో విలపించాడు. అప్పుడు , శ్రీ స్వామి వారి ” అమృత వాణి ” ఆలికి వినబడింది, దైవం పైనే దాడికి సిద్ధపడ్డావా ? ఎంత ధైర్యం … ? అని. అప్పుడు ఆలీ బిగ్గరగా రోదిస్తూ … క్షమాభిక్ష అడిగి, నేత్ర దానం చెయ్యమని వేడుకున్నాడు. అప్పుడు దయార్ద్రచిత్తుడయిన స్వామి వారు, నీవు వెనుదిరిగి వెళ్ళిపో, నీకు దృష్టి వస్తుందని ఆదేశించారు.
దానితో ఏమీ సాధించకుండానే రిక్త హస్తాలతో వెనుదిరిగాడు “ఆలీ”. ఉర్దూ లేక హిందీ భాషలో ” ఫిర్ నా ” అంటే వెనక్కి మళ్ళడం, ” ఫిరే ‘ అంటే వెనక్కి మళ్ళాడు అని అర్థం. ఎప్పుడు, ఎక్కడా ఓటమెరుగని సైనికాధ్యక్షుడైన ఆలీ వెనుతిరిగిన వెంటనే ఈ విషయం తెలుసుకున్న అందరూ ” ఆలీ ఫిరే, ఆలీ ఫిరే ” అని చెప్పుకునేవారు. కొన్ని సంస్థానాలకి సంబంధించిన గ్రామాలలో అయితే తిరుపతి ఆలయం మీదకు దండయాత్రకు వెళ్లిన ఆలీ తిరుపతిలోని ఒక ప్రదేశం నుంచి ముందుకెళ్లలేక వెనుదిరిగాడు ” ఆలీ ఫిరే “, “ఆలీ ఫిరే” అని సూచిస్తూ … చాటింపులు సైతం వేయించారు.
” ఆలీ ” ఏ ప్రాంతం నుంచి వెనక్కి మళ్ళాడో ఆ ప్రాంతాన్నే అప్పటివారు ప్రత్యేకంగా వచ్చి సందర్శించేవారు.ఆ ప్రదేశాన్ని చూడటానికి వెళ్ళేటప్పుడు లేదా వెళ్లి వచ్చిన తర్వాత ఎక్కడికి వెళ్లారని ఎవరైనా అడిగినప్పుడు ” అలీ ఫిరే” ప్రదేశానికి వెళ్తున్నామని చెప్పేవారు. కాలక్రమంగా ఆ ఆలీ ఫిరే అనే పదం – ఆలి పిరే గా రూపాంతరం చెంది ఇప్పుడు ” అలిపిరి గా స్థిరపడింది.
