భారత్ సమాచార్, ఆరోగ్యం ;
వాముని మనం చాలా రకాలుగా వినియోగిస్తుంటాం. ఎక్కువగా పిండి వంటల్లో వాడటాన్ని గమనించే ఉంటాం. దీనిలో ఎన్నో గొప్ప గుణాలు ఉన్నాయి. ఈ కారణంగా ఆయుర్వేద మందు షాపుల్లో వాముని ఎక్కువగా వాడతారు. వాముని ఆహారంలో వాడటం వలన ఆరోగ్యానికి కలిగే లాభాలు ఏమిటో చూద్దాం.
వాములో రిచ్ విటమిన్స్, మినరల్స్ ఉంటాయి. నియాసిన్, థయామిన్, సోడియం, పాస్ఫరస్, పొటాషియం, కాల్షియంలు ఉంటాయి. వీటితో పాటు కార్బోహైడ్రేట్స్, ఫ్యాటీ యాసిడ్స్, ఫైబర్స్, ప్రోటీన్, యాంటీ ఆక్సిడెంట్స్ కూడా ఉంటాయి. వీటి వల్ల ఆరోగ్యానికి ఎన్నో లాభాలున్నాయి.
వాములో యాంటీ ఇన్‌ఫ్లమేటరీ, యాంటీ మైక్రోబయల్ గుణాలు ఉన్నాయి. ఇవి ఆర్థరైటిస్ వంటి సమస్యల్ని తగ్గిస్తాయి. దీంతో ఎరుపుదనం, వాపు, కీళ్ళలో నొప్పులు తగ్గుతాయి. నేరుగా తీసుకోవడంతో పాటు.. వాముని పేస్టులా చేసి సమస్య ఉన్న చోట అప్లై చేయొచ్చు. లేదా వేడి నీటిలో వాముని వేసి అందులో కాసేపు సేదతీరొచ్చు.
వాములో థైమోల్ ఉంటుంది. ఈ గింజల్ని తీసుకోవడం వల్ల బీపి కంట్రోల్ అవుతుంది. జంతువులపై చేసిన అధ్యయనంలో తేలిన విషయం ఏంటంటే..వాముని తీసుకోవడం బీపి కంట్రోల్ అవ్వడమే కాకుండా, గుండె కణాలని ఆరోగ్యంగా ఉంచుతుంది.
వాముని తీసుకోవడం వల్ల శరీరంలో మంచి కొలెస్ట్రాల్ పెరుగుతుంది. చెడు కొలెస్ట్రాల్ తగ్గుతుంది. వాములో ఎక్కువగా డైటరీ ఫైబర్స్, ఫ్యాటీ యాసిడ్స్ ఉన్నాయి. ఇవి మంచి కొలెస్ట్రాల్ లెవల్స్‌ని పెంచుతాయి.
వర్షాకాలంలో చాలా మందికి జలుబు అవుతుంది. దీని వల్ల ముక్కు మూసుకుపోతుంది. ఇలాంటి సమస్యని వాము దూరం చేస్తుంది. దీనిని వాడడం వల్ల ఆస్తమా వంటి సమస్యలు కూడా తగ్గుతాయి. కొన్ని వాము గింజల్ని తీసుకుని వాటిని పిండి చేయాలి. ఇందులో కొద్దిగా బెల్లం కలిపి వాటిని నమలాలి. రోజుకి 2 నుంచి 3 సార్లు చేయండి. దీని వల్ల జలుబు తగ్గుతుంది.
చాలా మంది కడుపుకి సంబంధించిన సమస్యలతో బాధపడతారు. అలాంటివారికి వాము ఒక చక్కని ఔషధంగా పనిచేస్తుంది. ఇవి కొన్నిఎంజైమ్స్‌ని, జీర్ణ రసాలని విడుదల చేసి జీర్ణ సమస్యల్ని దూరం చేస్తాయి. దీనిని తతీసుకోవడం వల్ల అజీర్ణం, కడుపు నొప్పి, కడుపులో ఇబ్బంది వంటివి దూరమవుతాయి. దీంతో పాటు కడుపు అల్సర్స్ కూడా దూరమవుతాయి.
ఏం చేయాలి.
ముందుగా ఓ టీ స్పూన్ జీలకర్ర, 1 టీ స్పూన్ వాముని తీసుకోవాలి. అందులో హాఫ్ టీ స్పూన్ అల్లం వేయాలి. వీటన్నింటిని గ్లాసు నీటిలో మరిగించి గోరువెచ్చగా అయ్యాక తాగాలి.
వాములో ఎన్ని ఆరోగ్య ప్రయోజనాలు ఉన్నప్పటికీ ఎక్కువగా తీసుకోవడం కూడా ఆరోగ్యానికి అంత మంచిది కాదు. రోజుకి 2 స్పూన్ల పరిమాణం కంటే ఎక్కువగా వాడితే సమస్యలొస్తాయని గుర్తుంచుకోవాలి.
