భారత్ సమాచాార్, హైదరాబాద్ జిల్లా: ప్రత్యేక ఓటర్ల జాబితా సవరణ (Special Intensive Revision – SIR) ప్రక్రియ కొనసాగుతున్న నేపథ్యంలో, ఓటర్లు తమ వివరాలు విజయవంతంగా నమోదు అయ్యాయో లేదో సులభంగా తెలుసుకునే అవకాశం కల్పించారు. ఇంటర్నెట్ అవసరం లేకుండానే సాధారణ మొబైల్ ఫోన్ ద్వారా కేవలం ఒక SMS పంపి ఓటరు నమోదు స్థితిని పరిశీలించవచ్చని ఎన్నికల అధికారులు సూచిస్తున్నారు. స్మార్ట్‌ఫోన్ లేకున్నా ఈ సేవను వినియోగించుకోవచ్చని తెలిపారు.
ఈ సేవను ఉపయోగించేందుకు ఓటర్లు 1950 నంబర్‌కు ECI EPIC Number అనే ఫార్మాట్‌లో SMS పంపాలి. ఉదాహరణకు ECI UTQ0777245 అని టైప్ చేసి 1950కు పంపితే, కొద్దిసేపట్లో ఎన్నికల కమిషన్ నుంచి ప్రత్యుత్తర సందేశం వస్తుంది. అందులో ఓటరు పేరు, EPIC వివరాలు లేదా సంబంధిత సమాచారం కనిపిస్తే, SIR ప్రక్రియలో వివరాలు నమోదై ఉండే అవకాశం ఉంటుంది. ఒకవేళ సమాచారం అందకపోతే, సంబంధిత బూత్ లెవల్ ఆఫీసర్ (BLO)ను సంప్రదించి వివరాలను నిర్ధారించుకోవాలని అధికారులు సూచిస్తున్నారు.
EPIC (Electors Photo Identity Card) నంబర్ అనేది ప్రతి ఓటరికి ప్రత్యేకంగా కేటాయించే ఓటరు గుర్తింపు సంఖ్య. ఈ నంబర్ ఓటరు గుర్తింపు కార్డుపై ముద్రించి ఉంటుంది. SMS పంపేటప్పుడు ECI మరియు EPIC నంబర్ మధ్య తప్పనిసరిగా ఒక స్పేస్ ఇవ్వాలని, అలాగే EPIC నంబర్‌ను ఎలాంటి తప్పులు లేకుండా నమోదు చేయాలని అధికారులు సూచిస్తున్నారు. నెట్‌వర్క్ పరిస్థితుల కారణంగా ప్రత్యుత్తర సందేశం రావడానికి కొంత సమయం పట్టే అవకాశం కూడా ఉందని తెలిపారు.
ఎన్నికల సమయంలో ఎలాంటి ఇబ్బందులు తలెత్తకుండా ప్రతి ఓటరు తమ వివరాలను ముందుగానే ఒకసారి ధృవీకరించుకోవాలని ఎన్నికల అధికారులు విజ్ఞప్తి చేస్తున్నారు. సందేహాలు ఉన్నవారు తమ ప్రాంత బీఎల్‌ఓ లేదా సంబంధిత ఎన్నికల అధికారులను సంప్రదించాలని సూచించారు. ఓటు హక్కు ప్రతి పౌరుడికి అత్యంత విలువైన హక్కు కాబట్టి, ఒక చిన్న SMS ద్వారా మీ ఓటరు నమోదు స్థితిని ఇప్పుడే పరిశీలించుకోవాలని అధికారులు అవగాహన కల్పిస్తున్నారు.