భారత్ సమాచార్, మెదక్ జిల్లా: అసెంబ్లీ ప్రాంగణంలో బీఆర్‌ఎస్ మహిళా ఎమ్మెల్యేల పట్ల పోలీసులు దురుసుగా వ్యవహరించారని బీఆర్‌ఎస్ నేతలు ఆరోపించారు. మెదక్ జిల్లా నర్సాపూర్ ఎమ్మెల్యే సునీతా లక్ష్మారెడ్డిని పోలీసులు అవమానించారని పేర్కొన్నారు. ప్రజా సమస్యలను ప్రస్తావించేందుకు అసెంబ్లీకి వచ్చిన మహిళా ఎమ్మెల్యేల పట్ల పోలీసులు వ్యవహరించిన తీరుపై బీఆర్‌ఎస్ శ్రేణులు ఆగ్రహం వ్యక్తం చేశాయి.
ఈ సందర్భంగా ఎమ్మెల్యే సునీతా లక్ష్మారెడ్డి ఆవేదన వ్యక్తం చేశారు. తాము ప్రజలచే ఎన్నుకోబడిన ఎమ్మెల్యేలమని, అయినప్పటికీ కనీస గౌరవం ఇవ్వకుండా పోలీసులు దుర్మార్గంగా వ్యవహరించారని ఆమె ఆరోపించారు. “ఎమ్మెల్యేలు అని కూడా చూడకుండా ఇలా ప్రవర్తిస్తారా?” అంటూ ఆమె ప్రశ్నించారు. అసెంబ్లీ ప్రాంగణంలో చోటుచేసుకున్న పరిణామాలపై ఆమె తీవ్ర అసంతృప్తి వ్యక్తం చేశారు.
కాగా, బీఆర్‌ఎస్ మహిళా ఎమ్మెల్యేలు నల్ల దుస్తులు ధరించి అసెంబ్లీకి వెళ్లడంపై కూడా వివాదం నెలకొంది. నల్ల దుస్తులు ధరించి అసెంబ్లీకి వెళ్తే తప్పేంటని బీఆర్‌ఎస్ ఎమ్మెల్యేలు ప్రశ్నించారు. తమ నిరసనను వ్యక్తం చేసేందుకు నల్ల దుస్తులు ధరించడం ప్రజాస్వామ్య హక్కులో భాగమేనని పేర్కొంటూ పోలీసుల తీరుపై ఆగ్రహం వ్యక్తం చేశారు.
ప్రజల సమస్యలను అసెంబ్లీ వేదికగా ప్రభుత్వం దృష్టికి తీసుకెళ్లాల్సిన బాధ్యత తమపై ఉందని బీఆర్‌ఎస్ ఎమ్మెల్యేలు తెలిపారు. ప్రజాస్వామ్య పద్ధతిలో నిరసన తెలిపే తమ హక్కును అడ్డుకోవడం సరికాదని అన్నారు. మహిళా ఎమ్మెల్యేల పట్ల పోలీసులు వ్యవహరించిన తీరుపై బీఆర్‌ఎస్ శ్రేణులు తీవ్రంగా స్పందించాయి.