భారత్ సమాచార్, మెదక్ జిల్లా: వినాయక ఉత్సవాల నేపథ్యంలో నర్సాపూర్ పట్టణంలో శాంతిభద్రతల పరిరక్షణపై మెదక్ జిల్లా పోలీసులు ప్రత్యేక దృష్టి సారించారు. ఉత్సవాలు ప్రశాంతంగా, ఎలాంటి అవాంఛనీయ ఘటనలకు తావులేకుండా నిర్వహించేందుకు పోలీసు శాఖ ముందస్తు భద్రతా చర్యలను ముమ్మరం చేసింది.
మెదక్ జిల్లా ఎస్పీ ఆదేశాల మేరకు నర్సాపూర్ పట్టణంలోని వినాయక మండపాల వద్ద పోలీసులు ప్రత్యేక తనిఖీలు నిర్వహించారు. ఈ తనిఖీల్లో డాగ్ స్క్వాడ్‌తో పాటు బాంబ్ స్క్వాడ్ సిబ్బంది కూడా పాల్గొని మండపాలు, పరిసర ప్రాంతాలను క్షుణ్ణంగా పరిశీలించారు. వినాయక మండపాల వద్ద భక్తుల రద్దీ, ప్రజల భద్రత, అనుమానాస్పద వస్తువులు లేదా కదలికలపై పోలీసులు ప్రత్యేక నిఘా పెట్టారు.
ఎలాంటి అవాంఛనీయ ఘటనలకు అవకాశం లేకుండా ముందస్తుగానే భద్రతా లోపాలను గుర్తించి అవసరమైన చర్యలు చేపట్టేలా పోలీసు సిబ్బంది అప్రమత్తంగా వ్యవహరిస్తున్నారు. ఉత్సవాల సమయంలో శాంతిభద్రతలకు విఘాతం కలగకుండా పోలీసులు నిరంతరం పర్యవేక్షణ కొనసాగిస్తూ, ప్రతి వినాయక మండపం వద్ద భద్రతా పరిస్థితులను నిశితంగా గమనిస్తున్నారు. ప్రజల భద్రతకు అత్యంత ప్రాధాన్యత ఇస్తూ అవసరమైన అన్ని ముందస్తు చర్యలు చేపడుతున్నారు.
వినాయక ఉత్సవాలు ప్రశాంత వాతావరణంలో జరిగేలా మండపాల నిర్వాహకులు, భక్తులు, ప్రజలు పోలీసులకు సహకరించాలని అధికారులు సూచించారు. ఎక్కడైనా అనుమానాస్పద వస్తువు, వ్యక్తి లేదా కదలిక కనిపిస్తే వెంటనే పోలీసుల దృష్టికి తీసుకురావాలని కోరారు. వినాయక ఉత్సవాలు పూర్తయ్యే వరకు పోలీసుల నిఘా, భద్రతా చర్యలు కొనసాగుతాయని అధికారులు తెలిపారు.
ఈ తనిఖీల్లో నర్సాపూర్ ఏఎస్సై ముజీబ్, హోంగార్డు రాజు గౌడ్, డాగ్ స్క్వాడ్, బాంబ్ స్క్వాడ్ సిబ్బంది పాల్గొన్నారు. పోలీసుల తనిఖీలకు వినాయక మండపం నిర్వాహకులు, ఛత్రపతి యూత్ సభ్యులు ఆంజినేయులు గౌడ్, వేణు గౌడ్, నరేష్ గౌడ్ సహకరించారు.