భారత్ సమాచార్, మెదక్ జిల్లా: దేశవ్యాప్తంగా పనిచేస్తున్న పాత్రికేయుల డిమాండ్లను పరిష్కరించాలని ఇండియన్ జర్నలిస్ట్స్ యూనియన్ (ఐజేయూ) ఇచ్చిన పిలుపు మేరకు టీయూడబ్ల్యూజే ఆధ్వర్యంలో గాంధీ జయంతి సందర్భంగా మెదక్ జిల్లా కేంద్రంలోని రాందాస్ చౌరస్తాలో ‘డిమాండ్స్ డే’ నిరసన కార్యక్రమాన్ని నిర్వహించారు. అనంతరం కలెక్టర్ ఏఓ యూనుస్ ద్వారా రాష్ట్రపతికి వినతిపత్రాన్ని అందజేశారు.
సమగ్ర మీడియా కమిషన్ ఏర్పాటు చేయాలి
ఈ సందర్భంగా టీయూడబ్ల్యూజే జిల్లా అధ్యక్షులు ఎ. శంకర్ దయాళ్ చారి మాట్లాడుతూ గాంధీ జయంతిని ‘పనిచేస్తున్న పాత్రికేయుల డిమాండ్ల దినం’గా పాటిస్తున్నట్లు తెలిపారు. మీడియా రంగాన్ని సమగ్రంగా సమీక్షించి, ఆధునిక యుగానికి అనుగుణంగా విధాన సిఫార్సులు రూపొందించేందుకు కొత్త సమగ్ర మీడియా కమిషన్‌ను ఏర్పాటు చేయడం అత్యవసరమని అన్నారు.
పాత్రికేయులు, మీడియా సంస్థల భద్రత కోసం ప్రత్యేక కేంద్ర చట్టాన్ని రూపొందించాలని డిమాండ్ చేశారు. భారత ప్రజాస్వామ్యంలో పత్రికా రంగం నాలుగో స్తంభంగా కీలక పాత్ర పోషిస్తోందని, స్వతంత్రంగా, సురక్షితంగా పనిచేసే మీడియా వ్యవస్థ ప్రజాస్వామ్యానికి ఎంతో అవసరమని పేర్కొన్నారు.
పాత్రికేయులకు ప్రత్యేక రక్షణ కల్పించాలి
పాత్రికేయులు, మీడియా సిబ్బంది శారీరక దాడులు, ఏకపక్ష నిర్బంధాలు, ఆన్‌లైన్ వేధింపులు, సంస్థాగత బెదిరింపులను ఎదుర్కొంటున్నారని వారు పేర్కొన్నారు. మీడియా సిబ్బంది తమ విధులను నిర్భయంగా నిర్వహించేలా కేంద్ర ప్రభుత్వం పాత్రికేయులు, మీడియా సిబ్బంది, వార్తా సంస్థలను హింస, అనుచిత అణచివేత నుంచి రక్షించేలా పటిష్టమైన, స్వతంత్ర జాతీయ చట్టాన్ని తీసుకురావాలని డిమాండ్ చేశారు. 1955, 1958 చట్టాల కింద గతంలో హామీ ఇచ్చిన ప్రత్యేక రక్షణలను తక్షణమే పునరుద్ధరించాలని కోరారు.
కొత్త వేతన మండలి ఏర్పాటు చేయాలి
మీడియా ఉద్యోగుల కోసం గతంలో ఏర్పాటు చేసిన వేతన వ్యవస్థకు చాలా కాలం గడిచిందని, జీవన వ్యయాలు, ద్రవ్యోల్బణం గణనీయంగా పెరిగినప్పటికీ మీడియా కార్మికులకు చట్టబద్ధమైన వేతన నవీకరణలు అందడం లేదని అన్నారు. ముద్రణ, ప్రసార, డిజిటల్ మీడియా సిబ్బందిని కలుపుకొని న్యాయమైన, ద్రవ్యోల్బణానికి అనుగుణంగా సర్దుబాటు చేసిన వేతన నిర్మాణాలను సిఫార్సు చేసేందుకు కొత్త వేతన మండలిని ఏర్పాటు చేయాలని కోరారు.
తెలంగాణలో జర్నలిస్టులకు కాంగ్రెస్ ప్రభుత్వం తన ఎన్నికల ప్రణాళికలో ఇచ్చిన హామీ మేరకు ఇళ్లు, ఇళ్ల స్థలాల సమస్యను పరిష్కరించాలని డిమాండ్ చేశారు. ఉద్యోగుల మాదిరిగానే జర్నలిస్టులకు హెల్త్ కార్డులు మంజూరు చేసి క్యాష్‌లెస్ వైద్య చికిత్స అందించాలని కోరారు. జర్నలిస్టులపై జరుగుతున్న దాడులను అరికట్టేందుకు తగిన రక్షణ చట్టాన్ని తీసుకురావాలని డిమాండ్ చేశారు.
ఈ కార్యక్రమంలో జిల్లా ప్రధాన కార్యదర్శి ఎ. సంతోష్ కుమార్, రాష్ట్ర కార్యవర్గ సభ్యులు డీ.జి. శ్రీనివాస్ శర్మ, ఐజేయూ సభ్యులు శ్రీనివాస్ మిన్పూర్, ఎలక్ట్రానిక్ మీడియా అధ్యక్షులు బొందుగుల నాగరాజు, ప్రెస్ క్లబ్ కోశాధికారి అశోక్, గౌరవ సలహాదారులు ఫారూక్ హుస్సేన్, శ్రీధర్, హరినాథ్, గౌరవ అధ్యక్షులు కామాటి కృష్ణ, సీనియర్ జర్నలిస్టులు, యూనియన్ బాధ్యులు రమేష్ గౌడ్, నగేష్, శివ చరణ్, రాము పటేరి, ప్రకాష్, రామకృష్ణ గౌడ్, కృష్ణ గౌడ్, రాజశేఖర్, బోనగిరి చంద్రశేఖర్, గోవర్ధన్ రెడ్డి, చింతల రమేష్, ఖయ్యుం, యూసుఫ్ అలీ, సఫ్దర్, హమీద్, నరేందర్, నర్సింహులు, సత్యనారాయణ, బైరవరెడ్డి, రాంచందర్ రెడ్డి, గిరి, శ్రీహరి గౌడ్, కార్తీక్, సాయి, ఆంజనేయులు గౌడ్, సుభాష్, రాఘవులు, జనార్దన్, రఘు, స్వాగత్ రాజు, శ్రీను, రాజశేఖర్, అల్లాడి శేఖర్, లక్ష్మీనారాయణ, మురళీధర్, సంతోష్ గౌడ్ తదితరులు పాల్గొన్నారు.