భారత్ సమాచార్, మహబూబాబాద్ జిల్లా: ఇనుగుర్తి మండలంలోని కోమటిపల్లి గ్రామంలో శనివారం పోషణ మాసోత్సవాన్ని ఘనంగా నిర్వహించారు. స్థానిక సర్పంచ్ మద్దెల బిక్షపతి గౌడ్ అధ్యక్షతన ఐసీడీఎస్ అంగన్వాడీ-1 కేంద్రంలో ఈ కార్యక్రమాన్ని నిర్వహించారు.
ఈ సందర్భంగా చిన్నారులకు ఆరోగ్య పరీక్షలు నిర్వహించి, ఆరోగ్య లోపాలను గుర్తించారు. అంగన్వాడీ సిబ్బంది ఏర్పాటు చేసిన పోషకాహారం, ఆరోగ్యానికి సంబంధించిన చార్టులను సర్పంచ్ మద్దెల బిక్షపతి గౌడ్ ఆసక్తిగా పరిశీలించారు. ఆరు నెలల పాపకు అన్నప్రాశన కార్యక్రమాన్ని నిర్వహించారు.
పోషకాహారాన్ని సద్వినియోగం చేసుకోవాలి
ఐసీడీఎస్ ద్వారా అందించే పోషకాహారాన్ని లబ్ధిదారులకు ఎప్పటికప్పుడు అందజేస్తూ, వారు సక్రమంగా వినియోగించుకునేలా చూడాలని సర్పంచ్ మద్దెల బిక్షపతి గౌడ్ అంగన్వాడీ సిబ్బందికి సూచించారు. పోషకాహారం తీసుకోవడం ద్వారా సంపూర్ణ ఆరోగ్యం చేకూరుతుందని తెలిపారు. చిన్నారులు, గర్భిణులు, బాలింతల ఆరోగ్యంపై ప్రత్యేక శ్రద్ధ తీసుకోవాలని సూచించారు.
ఈ కార్యక్రమంలో ఉప సర్పంచ్ ఇస్లావత్ బాబు, ఐసీడీఎస్ సూపర్వైజర్ దుర్గ, ఏఎన్ఎం మంజుల, అంగన్వాడీ టీచర్లు జ్యోతి, రాజకుమారి, కవిత, గర్భిణులు, బాలింతలు, గ్రామస్తులు తదితరులు పాల్గొన్నారు.