భారత్ సమాచార్, మెదక్ జిల్లా: అణగారిన, బడుగు బలహీన వర్గాల ప్రజల హక్కుల కోసం పోరాడిన పండుగ సాయన్న ధైర్యసాహసాలు, తెగువ నేటి తరానికి స్ఫూర్తిదాయకమని మెదక్ జిల్లా కలెక్టర్ ప్రతిమా సింగ్ తెలిపారు. సామాజిక అసమానతలు, అన్యాయాలకు వ్యతిరేకంగా ప్రజల పక్షాన నిలిచిన ఆయన పోరాట స్ఫూర్తిని యువత ఆదర్శంగా తీసుకోవాలని పిలుపునిచ్చారు.
గురువారం మెదక్ కలెక్టరేట్ క్యాంప్ ఆఫీస్‌లో పండుగ సాయన్న జయంతి వేడుకలను నిర్వహించారు. ఈ కార్యక్రమానికి ముఖ్య అతిథిగా హాజరైన జిల్లా కలెక్టర్ ప్రతిమా సింగ్.. పండుగ సాయన్న చిత్రపటానికి పూలమాల వేసి ఘనంగా నివాళులర్పించారు. ఈ సందర్భంగా ఆయన చేసిన సేవలను, ప్రజల కోసం సాగించిన పోరాటాన్ని స్మరించుకున్నారు.
ఈ సందర్భంగా కలెక్టర్ మాట్లాడుతూ.. ఆనాటి భూస్వాములు, దొరల అరాచకాలకు వ్యతిరేకంగా పండుగ సాయన్న వీరోచితంగా పోరాడారని కొనియాడారు. సమాజంలో నెలకొన్న అసమానతలు, అన్యాయాలను ఎదిరిస్తూ అణగారిన వర్గాల ప్రజలకు అండగా నిలిచారని తెలిపారు. ప్రజల హక్కులు, ఆత్మగౌరవం కోసం ఆయన ప్రదర్శించిన ధైర్యసాహసాలు తెలంగాణ చరిత్రలో చిరస్థాయిగా నిలిచిపోతాయని పేర్కొన్నారు.
పండుగ సాయన్న పోరాటం ఒక వర్గానికో, కొంతమంది ప్రజలకో పరిమితం కాదని, అన్ని వర్గాల వారికి స్ఫూర్తినిచ్చేలా ఆయన జీవితం నిలుస్తుందని కలెక్టర్ తెలిపారు. సమాజంలో సమానత్వం, న్యాయం కోసం కృషి చేయాలనే సందేశాన్ని ఆయన పోరాటం అందిస్తోందని చెప్పారు. నేటి యువత పండుగ సాయన్న ఆశయాలను, తెగువను ఆదర్శంగా తీసుకుని సమాజ అభివృద్ధికి తమ వంతు కృషి చేయాలని పిలుపునిచ్చారు.
అదేవిధంగా మెదక్ కలెక్టరేట్‌లో జిల్లా రెవెన్యూ అధికారి (DRO) అంబదాస్ రాజేశ్వర్ కూడా పండుగ సాయన్న చిత్రపటానికి పూలమాల వేసి నివాళులర్పించారు. ప్రజల కోసం ఆయన చేసిన సేవలను కొనియాడారు.
ఈ కార్యక్రమంలో జిల్లా సమాచార, పౌర సంబంధాల అధికారి (DPRO) రామచంద్ర రాజు, జిల్లా BC సంక్షేమ శాఖ అధికారి ఉపేందర్, ముదిరాజ్ సంఘం నాయకులు, యువజన సంఘాల ప్రతినిధులు, వివిధ కుల సంఘాల నాయకులు, వివిధ శాఖల అధికారులు, ఉద్యోగులు, క్యాంప్ ఆఫీస్ సిబ్బంది తదితరులు పాల్గొన్నారు.