భారత్ సమాచార్, మేడ్చల్ మల్కాజిగిరి జిల్లా: కాలనీల్లో పెండింగ్‌లో ఉన్న అభివృద్ధి పనులను త్వరగా పూర్తి చేయడంపై MP ఈటల రాజేందర్ దృష్టి సారించారు. స్థానికులు తమ సమస్యలను ఆయన దృష్టికి తీసుకురావడంతో వెంటనే స్పందించి, సంబంధిత అధికారులతో మాట్లాడి పనులు ప్రారంభించాలని ఆదేశించారు.
మేడ్చల్ మల్కాజిగిరి జిల్లా కీసర మండలం చీరాల పరిధిలోని ఇందిరమ్మ కాలనీలో ఏర్పాటు చేసిన చిల్డ్రన్ పార్క్, ఓపెన్ జిమ్‌ను MP ఈటల రాజేందర్ ప్రారంభించారు. ఈ సందర్భంగా కాలనీ అభివృద్ధి, స్థానికుల అవసరాలకు సంబంధించిన అంశాలపై చర్చించారు. ఈ క్రమంలో జిన్నారం ప్రాంతంలో పెండింగ్‌లో ఉన్న సమస్యలను ఆయన దృష్టికి తీసుకెళ్లగా, వాటి పరిష్కారానికి వెంటనే చర్యలు తీసుకోవాలని సంబంధిత అధికారులకు సూచించారు.
జిన్నారంలో నిలిచిపోయిన పనులను ప్రారంభించేలా మల్కాజిగిరి మున్సిపల్ కార్పొరేషన్ కమిషనర్ వినయ్ కృష్ణారెడ్డితో MP ఈటల రాజేందర్ మాట్లాడారు. పెండింగ్ పనులపై దృష్టి సారించి, వాటిని ప్రారంభించాలని ఆదేశించారు. దీంతో స్థానిక సమస్యల పరిష్కారంపై ఆయన తక్షణమే స్పందించినట్లు కాలనీ వాసులు తెలిపారు.
ఇందిరమ్మ కాలనీ అభివృద్ధి కోసం కాలనీ అధ్యక్షుడు సంపత్ కృషి చేస్తున్నారని ఈ సందర్భంగా పేర్కొన్నారు. కాలనీ ప్రజలకు అవసరమైన సౌకర్యాలు కల్పించడంతో పాటు, పెండింగ్ సమస్యలను అధికారుల దృష్టికి తీసుకెళ్లి పరిష్కారానికి కృషి చేస్తున్నట్లు తెలిపారు. చిల్డ్రన్ పార్క్, ఓపెన్ జిమ్ ప్రారంభంతో స్థానికులకు మరింత ఉపయోగకరమైన వసతులు అందుబాటులోకి వచ్చాయి.