భారత్ సమాచార్, మెదక్ జిల్లా: తెలంగాణ రాష్ట్ర సాధన కోసం సాగిన ఉద్యమంలో కీలక పాత్ర పోషించిన ఉద్యమకారుల సేవలను గుర్తిస్తూ తెలంగాణ ఉద్యమకారుల ఫోరం ప్రశంసా పత్రాలను అందజేసింది. తెలంగాణ కోసం వారు చేసిన పోరాటాలు, అందించిన సేవలకు గౌరవంగా ఈ ప్రశంసా పత్రాలను అందించినట్లు పేర్కొన్నారు.
మెదక్ జిల్లా రామాయంపేటలో జరిగిన ఈ కార్యక్రమంలో తెలంగాణ రాష్ట్ర సాధన కోసం ఉద్యమకారులు చేసిన కృషిని గుర్తుచేశారు. ప్రత్యేక రాష్ట్ర సాధన కోసం సాగిన పోరాటంలో వారి పాత్ర, సేవలను ప్రశంసా పత్రాల్లో ప్రస్తావించారు. ఉద్యమ సమయంలో చేసిన త్యాగాలను గుర్తించడం, ఉద్యమకారులకు తగిన గౌరవం కల్పించడం ఎంతో ముఖ్యమని పలువురు అభిప్రాయపడ్డారు.
తెలంగాణ ఉద్యమకారుల పోరాట స్ఫూర్తి, త్యాగాలను భవిష్యత్ తరాలకు తెలియజేయాల్సిన అవసరం ఉందని ఈ సందర్భంగా పేర్కొన్నారు. రాష్ట్ర సాధన కోసం పోరాడిన ప్రతి ఉద్యమకారుడి సేవలు చిరస్మరణీయమని, వారి కృషిని గౌరవించడం సమాజ బాధ్యత అని గుర్తుచేశారు.
ఈ కార్యక్రమానికి ముఖ్య అతిథిగా తెలంగాణ ఉద్యమకారుల ఫోరం మెదక్ జిల్లా అధ్యక్షుడు, మాజీ ఎంపీపీ పల్లె రామచంద్ర గౌడ్ హాజరయ్యారు. నిజాంపేట మండల అధ్యక్షుడు చల్మెటి నాగరాజు, మాసాయిపేట మల్లేశం, పాతూరి రాజు, నగేష్ యాదవ్, బైరం సిద్ధరాములు తదితరులు పాల్గొన్నారు.