భారత్ సమాచార్, ఉద్యోగం : ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు ఐదు సంస్థలు, నియామక బోర్డుల నుంచి ఉద్యోగ ప్రకటనలు వెలువడ్డాయి. ఉత్తరప్రదేశ్ పబ్లిక్ సర్వీస్ కమిషన్ (UPPSC), రైల్వే రిక్రూట్‌మెంట్ బోర్డు (RRB), గోవా షిప్‌యార్డ్, భారత్ ఎలక్ట్రానిక్స్ లిమిటెడ్ (BEL), జమ్మూ కశ్మీర్ సర్వీసెస్ సెలక్షన్ బోర్డు (JKSSB) మొత్తం 2,665 పోస్టుల భర్తీకి ప్రక్రియ చేపట్టాయి. వీటిలో డిగ్రీ, ఇంజినీరింగ్, డిప్లొమా, ఐటీఐ, పదో తరగతి అర్హతలున్న అభ్యర్థులకు అవకాశాలు ఉన్నాయి.
UPPSC సమీక్ష అధికారి, సహాయ సమీక్ష అధికారి పోస్టులకు 501 ఖాళీలు ప్రకటించింది. డిగ్రీ అర్హత కలిగినవారు నవంబర్ 26 వరకు దరఖాస్తు చేసుకోవచ్చు. రైల్వేలో CEN 08/2026 కింద 1,265 స్టేషన్ మాస్టర్ పోస్టులు భర్తీ చేయనున్నారు. ఏదైనా డిగ్రీ పూర్తి చేసిన 20–33 ఏళ్ల అభ్యర్థులు (నిబంధనల ప్రకారం వయో సడలింపుతో) నవంబర్ 25లోగా దరఖాస్తు చేయాలి. ఈ పోస్టులకు ప్రారంభ వేతనం రూ.35,400గా నిర్ణయించారు.
గోవా షిప్‌యార్డ్‌లో నాన్‌ ఎగ్జిక్యూటివ్ విభాగంలో 91 పోస్టుల భర్తీకి ప్రకటన విడుదలైంది. పోస్టును బట్టి పదో తరగతి, ఐటీఐ, డిప్లొమా, నర్సింగ్ తదితర అర్హతలు అవసరం. నవంబర్ 27 సాయంత్రం 5 గంటల్లోగా దరఖాస్తు చేయాలి. మొదటి ఏడాది నెలవారీ వేతనం పోస్టును బట్టి రూ.27,200 నుంచి రూ.41,400 వరకు ఉంటుంది. BELలో ప్రొబేషనరీ ఇంజినీర్ పోస్టులకు 350 ఖాళీలు ఉన్నాయి. సంబంధిత విభాగంలో B.E./B.Tech లేదా నాలుగేళ్ల B.Sc ఇంజినీరింగ్ డిగ్రీ ఉన్నవారు నవంబర్ 18లోగా దరఖాస్తు చేసుకోవాలి. ఈ పోస్టుల పే స్కేల్ రూ.40,000–1,40,000.
ఇక JKSSB జూనియర్ ఇంజినీర్ (సివిల్) పోస్టులకు 458 ఖాళీలు ప్రకటించింది. జల్ శక్తి శాఖలో 282, పబ్లిక్ వర్క్స్ (R&B) శాఖలో 176 పోస్టులు ఉన్నాయి. మూడేళ్ల సివిల్ ఇంజినీరింగ్ డిప్లొమా, సివిల్ ఇంజినీరింగ్ డిగ్రీ లేదా AMIE అర్హత ఉన్నవారు దరఖాస్తు చేసుకోవచ్చు. నవంబర్ 30 నుంచి డిసెంబర్ 29 వరకు ఆన్‌లైన్‌లో దరఖాస్తులు స్వీకరిస్తారు. పే లెవల్-6 కింద రూ.35,400–1,12,400 వేతన శ్రేణి ఉంటుంది. అభ్యర్థులు దరఖాస్తు చేసే ముందు సంబంధిత అధికారిక నోటిఫికేషన్లలో వయోపరిమితి, రిజర్వేషన్లు, ఫీజు, ఎంపిక విధానం, అర్హతలను పూర్తిగా పరిశీలించాలి.