భారత్ సమాచార్, లైఫ్ స్టైల్ : ముఖంపై ఉండే అవాంఛిత రోమాలను తొలగించుకోవడానికి చాలామంది మహిళలు ఫేస్ రేజర్లను ఉపయోగిస్తున్నారు. అయితే షేవింగ్ చేసుకుంటే వెంట్రుకలు మునుపటి కంటే మందంగా, నల్లగా పెరుగుతాయనే భయం కూడా చాలామందిలో ఉంది. డెర్మటాలజిస్టుల ప్రకారం ఈ విషయంలో ఆందోళన అవసరం లేదు. మహిళలు సరైన పద్ధతిలో ముఖంపై షేవింగ్ చేసుకోవడం సాధారణంగా సురక్షితమే. అయితే చర్మం స్వభావాన్ని బట్టి జాగ్రత్తలు తీసుకోవడం ముఖ్యం.
మాయో క్లినిక్, అమెరికన్ అకాడమీ ఆఫ్ డెర్మటాలజీ వెల్లడించిన వివరాల ప్రకారం.. షేవింగ్ వల్ల వెంట్రుకల కుదుళ్లపై ఎలాంటి ప్రభావం ఉండదు. రేజర్ చర్మం ఉపరితలంపై ఉన్న వెంట్రుకలను మాత్రమే కత్తిరిస్తుంది. కాబట్టి వాటి రంగు, మందం లేదా పెరిగే వేగం మారవు. అయితే కత్తిరించిన వెంట్రుకల చివర్లు మొద్దుబారినట్లుగా ఉండటంతో తిరిగి పెరిగేటప్పుడు గరుకుగా, మందంగా కనిపించవచ్చు. ఇది తాత్కాలికమైన అనుభూతి మాత్రమే.
ఫేస్ షేవింగ్ వల్ల ముఖంపై ఉన్న సన్నని రోమాలు తొలగి చర్మం నునుపుగా కనిపిస్తుంది. అలాగే డెర్మాప్లానింగ్ పద్ధతిలో రోమాలతో పాటు ఉపరితలంపై పేరుకున్న మృతకణాలు కూడా తొలగుతాయి. దీనివల్ల మేకప్ ఉత్పత్తులు చర్మానికి మెరుగ్గా పట్టే అవకాశం ఉంటుంది. అయితే ఈ ప్రయోజనాలు అందరికీ ఒకేలా ఉండవు. వాక్సింగ్‌తో పోలిస్తే షేవింగ్ త్వరగా పూర్తయ్యే పద్ధతి అయినప్పటికీ ఫలితం తాత్కాలికమే.
షేవింగ్‌కు ముందు ముఖాన్ని శుభ్రం చేసుకుని, చర్మాన్ని తడిపి, షేవింగ్ జెల్ లేదా క్రీమ్ ఉపయోగించాలి. శుభ్రమైన కొత్త రేజర్‌తో వెంట్రుకలు పెరిగే దిశలోనే మెల్లగా షేవ్ చేయాలి. అనంతరం మాయిశ్చరైజర్ రాసుకోవాలి. మొటిమలు, ఎగ్జిమా, సోరియాసిస్ లేదా ఇతర చర్మ సమస్యలు ఉన్నవారు ముందుగా డెర్మటాలజిస్టును సంప్రదించాలి. ముఖంపై అకస్మాత్తుగా లేదా అసాధారణంగా రోమాలు పెరుగుతుంటే హార్మోన్ల సమస్యలు సహా ఇతర కారణాల కోసం వైద్యుల సలహా తీసుకోవడం మంచిది.