భారత్ సమాచార్, మెదక్ జిల్లా : నర్సాపూర్ రహదారిపై చిన్న చింతకుంట గ్రామ గేటు వద్ద ఉన్న బ్రహ్మంగారి విగ్రహాన్ని ధ్వంసం చేసిన దుండగులను గుర్తించి కఠినంగా శిక్షించాలని విశ్వకర్మ సంఘం సభ్యులు, బీజేపీ నాయకులు డిమాండ్ చేశారు. విగ్రహం ధ్వంసం ఘటనపై వారు ఆగ్రహం వ్యక్తం చేస్తూ, బాధ్యులపై తక్షణమే చర్యలు తీసుకోవాలని కోరారు.
గ్రామ గేటు వద్ద ఏర్పాటు చేసిన బ్రహ్మంగారి విగ్రహాన్ని గుర్తుతెలియని వ్యక్తులు ధ్వంసం చేయడంపై సంఘం సభ్యులు ఆందోళన వ్యక్తం చేశారు. ఇలాంటి ఘటనలు సమాజంలో ఉద్రిక్తతలకు దారితీసే అవకాశం ఉందని పేర్కొన్నారు. ప్రజల ఆధ్యాత్మిక భావాలను గౌరవిస్తూ విగ్రహాలకు రక్షణ కల్పించాల్సిన బాధ్యత అధికారులపై ఉందని తెలిపారు.
ఈ ఘటనపై పోలీసులు వెంటనే విచారణ చేపట్టి, విగ్రహ ధ్వంసానికి పాల్పడిన వ్యక్తులను గుర్తించాలని డిమాండ్ చేశారు. బాధ్యులపై చట్టప్రకారం కఠిన చర్యలు తీసుకోవడంతో పాటు భవిష్యత్తులో ఇలాంటి ఘటనలు పునరావృతం కాకుండా తగిన భద్రతా చర్యలు చేపట్టాలని కోరారు.