భారత్ సమాచార్, మెదక్ జిల్లా : వెల్దుర్తి గ్రామంలో ప్రజలు ఎదుర్కొంటున్న సమస్యలను అధికారులు తక్షణమే పరిష్కరించాలని కోరుతూ వెల్దుర్తికి చెందిన గ్రామ యువకులు సర్పంచ్, ఈఓ అధికారులకు ఫిర్యాదు అందజేశారు. గ్రామంలో ప్రధానంగా వేధిస్తున్న వీధి కుక్కల బెడదతో పాటు మటన్ ధరల నియంత్రణపై చర్యలు తీసుకోవాలని వారు విజ్ఞప్తి చేశారు. ప్రజల భద్రత, సంక్షేమాన్ని దృష్టిలో పెట్టుకుని సమస్యలపై అధికారులు ప్రత్యేక దృష్టి సారించాలని కోరారు.
గ్రామంలో వీధి కుక్కల సంఖ్య రోజురోజుకూ పెరుగుతుండటంతో ప్రజలు తీవ్ర ఇబ్బందులు ఎదుర్కొంటున్నారని యువకులు తెలిపారు. ముఖ్యంగా చిన్నపిల్లలు, మహిళలు, వృద్ధులు రోడ్లపైకి రావాలంటే భయపడుతున్నారని పేర్కొన్నారు. ఇప్పటికే కుక్కల దాడుల ఘటనలు చోటుచేసుకుంటుండటంతో ఎప్పుడు ఏ ప్రమాదం జరుగుతుందోనని గ్రామస్థులు ఆందోళన చెందుతున్నారని వివరించారు. పరిస్థితి మరింత తీవ్రం కాకముందే సంబంధిత అధికారులు స్పందించి వీధి కుక్కల నియంత్రణకు తగిన చర్యలు చేపట్టి శాశ్వత పరిష్కారం చూపాలని డిమాండ్ చేశారు.
అదేవిధంగా గ్రామంలో మటన్ ధరలు సామాన్య ప్రజలకు భారంగా మారాయని యువకులు పేర్కొన్నారు. విక్రయదారులు ఇష్టానుసారంగా ధరలు నిర్ణయించకుండా సంబంధిత అధికారులు పర్యవేక్షించాలని కోరారు. మటన్ విక్రయాలకు సంబంధించి పారదర్శకమైన ధరల విధానం అమలు చేసి, ప్రతి దుకాణం వద్ద ధరల పట్టిక తప్పనిసరిగా ఏర్పాటు చేయించాలని విజ్ఞప్తి చేశారు. అధిక ధరలకు విక్రయాలు జరగకుండా అధికారులు నిరంతర తనిఖీలు చేపట్టాలని సూచించారు.
ఈ రెండు సమస్యలపై అధికారులు వెంటనే స్పందించి ప్రజలకు న్యాయం చేయాలని గ్రామ యువకులు కోరారు. ఈ ఫిర్యాదు ఎవరికీ వ్యతిరేకంగా కాదని, ఏ ఒక్కరినీ లక్ష్యంగా చేసుకుని చేయలేదని స్పష్టం చేశారు. కేవలం గ్రామ ప్రజల భద్రత, సంక్షేమం, ప్రయోజనాల కోసమే సమస్యలను అధికారుల దృష్టికి తీసుకెళ్లినట్లు తెలిపారు. గ్రామంలో ప్రజా సమస్యల పరిష్కారం కోసం యువకులుగా తమ వంతు కృషి కొనసాగిస్తామని పేర్కొన్నారు.