భారత్ సమాచార్, మహబూబాబాద్ జిల్లా: మండల కేంద్రం ఇనుగుర్తిలోని వాగ్దేవి కాన్సెప్ట్ స్కూల్లో ఆదివారం బాలల దినోత్సవ వేడుకలను ఘనంగా నిర్వహించారు. పాఠశాల కరస్పాండెంట్ చిన్నాల కట్టయ్య యాదవ్ ఆధ్వర్యంలో జరిగిన ఈ కార్యక్రమంలో విద్యార్థులు ఉత్సాహంగా పాల్గొని తమ ప్రతిభను చాటుకున్నారు. చిన్నారులు వివిధ వేషధారణల్లో కనిపిస్తూ అందరినీ ఆకట్టుకున్నారు.
నేడు పుస్తకాలు పట్టిన తమ చేతులతో రేపు దేశాన్ని అన్ని రంగాల్లో ముందుకు తీసుకెళ్తామని చిన్నారులు తమ ప్రదర్శనల ద్వారా చాటిచెప్పారు. కొందరు ఖాకీ దుస్తుల్లో పోలీస్ అధికారులుగా, మరికొందరు తెల్లకోటు ధరించి డాక్టర్లుగా, ఇంకొందరు టై కట్టుకుని కలెక్టర్లుగా కనిపించారు. ఇలా భవిష్యత్తులో తాము ఏ రంగంలో స్థిరపడాలనుకుంటున్నారో వేషధారణల ద్వారా చక్కగా చూపించారు. చిన్న వయసులోనే పెద్ద పెద్ద లక్ష్యాలను ఎంచుకుని వాటిని సాధించాలనే పట్టుదల తమలో ఉందని చాటారు.
కలల సాకారానికి కృషి చేస్తాం: కట్టయ్య
ఈ సందర్భంగా పాఠశాల కరస్పాండెంట్ చిన్నాల కట్టయ్య మాట్లాడుతూ.. విద్యార్థులకు కేవలం చదువు మాత్రమే కాకుండా, పెద్ద కలలు కనడం, వాటిని నిజం చేసుకునేందుకు కష్టపడటం కూడా నేర్పిస్తున్నామని తెలిపారు. పిల్లల్లో అపారమైన శక్తి, ప్రతిభ దాగి ఉంటాయని, వాటిని చిన్నప్పటి నుంచే గుర్తించి సరైన దిశలో ప్రోత్సహిస్తే కుటుంబానికి, గ్రామానికి, దేశానికి గర్వకారణంగా ఎదుగుతారని చెప్పారు.
స్వామి వివేకానందుడి స్ఫూర్తితో విద్యార్థుల్లో ఆత్మవిశ్వాసం, పట్టుదల పెంపొందించేలా పాఠశాలలో కార్యక్రమాలు నిర్వహిస్తున్నామని తెలిపారు. బాలల దినోత్సవం సందర్భంగా ఒక్కరోజు వేషధారణలతోనే ఈ ప్రయత్నం ఆగిపోకూడదని, పిల్లలు ఎంచుకున్న లక్ష్యాలను నిజం చేసుకునేలా పాఠశాల తరఫున నిరంతరం ప్రోత్సాహం అందిస్తామని చెప్పారు.
చదువుతో పాటు క్రీడలు, సాంస్కృతిక కార్యక్రమాలు, ఇతర రంగాల్లోనూ విద్యార్థులు ముందుకు వెళ్లేలా తమ పాఠశాల కృషి చేస్తుందని కట్టయ్య వివరించారు. ప్రతి విద్యార్థిలోని ప్రత్యేక ప్రతిభను గుర్తించి, వారి భవిష్యత్తుకు బాటలు వేయడమే తమ లక్ష్యమని పేర్కొన్నారు.
ఈ వేడుకల్లో పాఠశాల అధ్యాపక బృందం శిరీష, అప్సర, నవ్య, షహీన్, శ్రీలత, స్రవంతితో పాటు పెద్ద సంఖ్యలో విద్యార్థుల తల్లిదండ్రులు పాల్గొన్నారు. చిన్నారుల వేషధారణలు, వారి ఉత్సాహం కార్యక్రమానికి ప్రత్యేక ఆకర్షణగా నిలిచాయి.