భారత్ సమాచార్, మెదక్ జిల్లా: మెదక్ జిల్లా కౌడిపల్లి మండలం దేవులపల్లి గ్రామంలో పుట్టలో నుంచి పురాతన లక్ష్మీనరసింహ స్వామి రాతి విగ్రహం బయటపడటం స్థానికంగా ఆసక్తికరంగా మారింది. గ్రామానికి చెందిన ఓ భక్తుడికి కలలో నరసింహ స్వామి కనిపించి, పుట్టలో తన విగ్రహం ఉందని, దానిని వెలికితీయాలని సూచించినట్లు గ్రామస్తులు చెబుతున్నారు.
ఈ విషయాన్ని ఆ భక్తుడు గ్రామస్తులకు తెలియజేయడంతో వారంతా కలిసి సంబంధిత పుట్ట వద్దకు వెళ్లి తవ్వకాలు చేపట్టారు. ఈ క్రమంలో పుట్టలో నుంచి పురాతన రాతి విగ్రహం బయటపడినట్లు సమాచారం. విగ్రహం లక్ష్మీనరసింహ స్వామివారిదిగా గుర్తించడంతో గ్రామంలో ఒక్కసారిగా భక్తిభావం నెలకొంది.
పుట్టలో నుంచి స్వామివారి విగ్రహం బయటపడిన విషయం తెలుసుకున్న గ్రామస్తులు ఆశ్చర్యం వ్యక్తం చేశారు. ఈ వార్త చుట్టుపక్కల ప్రాంతాలకు కూడా వ్యాపించడంతో పెద్ద సంఖ్యలో భక్తులు దేవులపల్లికి చేరుకుని స్వామివారిని దర్శించుకున్నారు. విగ్రహం బయటపడటాన్ని గ్రామానికి దైవానుగ్రహంగా భావిస్తూ భక్తులు ఆనందం వ్యక్తం చేశారు.
ఈ విషయం తెలుసుకున్న గ్రామ సర్పంచ్ తిరుపతి రెడ్డి అక్కడికి చేరుకుని లక్ష్మీనరసింహ స్వామివారికి ప్రత్యేక పూజలు నిర్వహించారు. భక్తిశ్రద్ధలతో స్వామివారిని కొలుస్తూ గ్రామ ప్రజలందరికీ స్వామివారి ఆశీస్సులు ఉండాలని ప్రార్థించారు.
దేవులపల్లిలో బయటపడిన ఈ పురాతన రాతి విగ్రహం ఇప్పుడు గ్రామంలోనే కాకుండా చుట్టుపక్కల ప్రాంతాల్లోనూ చర్చనీయాంశంగా మారింది. ఈ విగ్రహం ఎంత పురాతనమైనది? దాని చారిత్రక నేపథ్యం ఏమిటి? అనే విషయాలపై స్థానికుల్లో ఆసక్తి నెలకొంది. సంబంధిత అధికారులు, పురావస్తు శాఖ నిపుణులు విగ్రహాన్ని పరిశీలించి దాని చరిత్రను వెల్లడించాలని గ్రామస్తులు కోరుతున్నారు.
కలలో కనిపించిన స్వామివారి సూచనతో పుట్టలో నుంచి లక్ష్మీనరసింహ స్వామి విగ్రహం బయటపడిందన్న వార్తతో దేవులపల్లి గ్రామం ఒక్కసారిగా భక్తిమయంగా మారింది.