భారత్ సమాచార్, అక్షర ప్రపంచం;
వేదవతి ప్రతిరోజు తన ఇంటి పిట్టగోడపై ఆకులో రెండు ఇడ్లిలు పెడుతూ వచ్చేది, ఆకలితో ఉన్నవాళ్లు ఎవరైనా తింటారు అని. ఆ దారి వెంట వెళ్లే ఒక ముసలాయన ఆ ఇడ్లిలు తీసుకోవడం ఏదో చిన్నగా గొణుక్కుంటూ వెళ్లడం పరిపాటిగా మారింది.ఒకరోజు వేదవతి గోడ పక్కనే నిలబడి అతను ఏమి అంటున్నాడో వినాలని అనుకున్నది. ఆ పెద్దాయన చెబుతున్న మాటలు… నువ్వు చేసిన పాపం నీ దగ్గరే ఉంటుంది. నువ్వు చేసే పుణ్యం వచ్చి నిన్నే చేరుతుంది. ప్రతిరోజు అతను ఈ మాటలే చెబుతున్నాడు. రోజు ఇడ్లి పెడుతున్నాను తీసుకు పోతున్నాడు. నువ్వు మహాలక్ష్మివి చల్లగా ఉండమ్మా అని చేతులెత్తి మొక్కక పొయినా పర్లేదు. ఇడ్లిలు బావున్నాయని చెప్పకపోయినా పర్లేదు.ధన్యవాదాలు అమ్మ అని చెప్పడం కూడా తెలియలేదా ఇతనికి..?
ఏదో ఆ చెత్త వాగుడు వాగిపోతున్నాడు అని చాల కోపంతో రగిలిపోయింది, అయినా కూడా ఇడ్లిలు పెట్టడం మానలేదు. రోజు రోజుకి అతనిపై పెరుగుతున్న కోపం అతనిని చంపేయాలి అనేంతగా మారిపోయింది. ఒకరోజు ఆ ఇడ్లీలపై కాస్త విషం చల్లి పెట్టబోయింది. కానీ ఎందుకో మనసు ఒప్పుకోలేదు. చేతులు వణకడం మొదలయింది. ఆలోచన మొదలయింది… చ వద్దు అతను అలాఉంటే నేను ఎందుకు ఇలా మారిపోయాను అని ఆ ఇడ్లిలు పడేసి మంచి ఇడ్లిలు పెట్టింది. ఆ వ్యక్తి ఇడ్లిలు తీసుకుని మళ్లీ అవే మాటలు చెప్తూ వెళ్ళాడు. కొట్టాలన్న కోపం వచ్చినా తనను తాను సమాధాన పరుచుకుంది. ఆ రోజు మిట్ట మధ్యాహ్నం ఎవరో తలుపు కొట్టినట్టు ఉంటె వెళ్లి తలుపు తీసింది. ఎదురుగా మురికి బట్టలతో ఓ యువకుడు. అతను ఎవరో కాదు సొంతంగా ఉద్యోగం చేసుకుంటానని ఇల్లు వదిలి అలిగి వెళ్లిన తన కొడుకు.
అమ్మా…ఇంటికి వస్తుంటే ఎవరో నా పర్సు దొంగలించేసారు. చేతిలో చిల్లి గవ్వ లేదు. బాగా ఆకలి కళ్లు తిరిగి పడిపోయాను. ఎవరో ఓ ముసలాయన రెండు ఇడ్లిలు ఇచ్చి నా ఆకలి తీర్చాడు, నా ప్రాణాలు కాపాడాడు అని చెప్పాడు. ఆ మాటలు వినగానే ఆమెకు వణుకు పుట్టేసింది. విషం కలిపిన ఇడ్లిలు పెట్టుంటే నా కొడుకుకి నేనే యముడినై ఉండి ఉంటానే అని కంటతడి పెట్టుకుంది. ఇప్పుడు ఆమెకు ఆ ముసలాయన మాటలు అర్థం అయింది. నువ్వు చేసిన పాపం నీతోనే ఉంటుంది. నువ్వు చేసే మంచి నిన్ను వెతుకుని వచ్చి చేరుతుంది. అందరికి అన్ని అర్థం అవ్వవు. అర్థం అయ్యేంతవరకు ఎవరము ఎదురుచూడము. చేసిన ధర్మం ఎప్పుడూ ఏదో ఒక రూపంలో మనకు వచ్చిచేరుతుంది. ఏదో ఒక ధర్మం చేయడం మనిషి అలవాటు చేసుకోవాలి. మనం తెలియక చేసే తప్పులనుండి బయట పడే మార్గం మంచి పనులు చేయడం మాత్రమే.
