పంచారామాల ప్రత్యేకత గురించి తెలుసుకుందాం

భారత్ సమాచార్, ఆధ్యాత్మికం ;

1. దాక్షారామము

పంచరామాల్లో మొదటిదైన దాక్షారామము తూర్పుగోదావరి జిల్లాలోని రామచంద్రాపురంలో ఉంది. ఇక్కడ స్వామిని “భీమేశ్వరుడు” అని పిలుస్తారు. స్వామి లింగాకారం 60 అడుగులు ఎత్తులో ఉంటుంది. పై అంతస్తు నుండి పూజలు నిర్వహిస్తారు. ఈ ఆలయం ప్రత్యేకత ఏమిటంటే ఇక్కడి లింగాకారం సగం భాగం తెలుపు మరియు సగభాగం నలుపుతో ఉంటుంది.ఇక్కడ దక్షప్రజాపతి యజ్ఞం నిర్వహించాడు. కనుక ఈ ప్రాంతానికి దాక్షారామము అని పేరు వచ్చిందంటారు.

2. అమరారామము

పంచారామల్లో రెండవదైన ‘అమరారామము’, గుంటూరు జిల్లాలోని అమరావతిలో కృష్ణానదీతీరమునందు వెలసినది. ఇక్కడ స్వామిని “అమరేశ్వరుడు” అని పిలుస్తారు. గర్భగుడిలో స్వామి విగ్రహం 9 అడుగుల ఎత్తులో, తెల్లగా మెరుస్తూ ఉంటుంది. ఈ ఆలయం 20 అడుగుల ఎత్తుగల విశాలమైన వేదికపైన నిర్మించబడింది. అమరేశ్వరుడైన ‘ఇంద్రుడు’ చేత ప్రతిష్టించి ఈ ఆలయానికి తన నగరమైన అమరావతి పేరునే పెట్టారు అని పురాణాలలో చెప్పబడి యున్నది.

3. క్షీరారామము

క్షీరారామము, పశ్చిమగోదావరి జిల్లాలోని పాలకొల్లులో కలదు. ఇక్కడ ‘శివుని’ మూర్తిని “శ్రీ క్షీరా రామలింగేశ్వర స్వామి” అని పిలుస్తారు. ఇక్కడ స్వామివారిని త్రేతాయుగ కాలంలో ‘సీతారాములు’ కలిసి ప్రతిష్ఠించారట. ఈ గ్రామానికి పాలకొల్లు అని పేరు రావడానికి కూడా ఒక కధ ఉంది. ‘శివుడు’ తన బాణమును భూమిలోనికి వెయ్యగానే భూమి నుండి పాలధార వచ్చిందట. క్షీరం అనగా పాలు, దీనిమూలంగా క్షీరపురి అనే పేరు వచ్చింది. క్రమంగా ‘క్షీరపురి’ కాస్తా ‘పాలకొల్లుగా’ మార్పు చెందింది. స్వామి వారి ఆలయాన్ని 11వ శతాబ్దంలో చాళుక్యులు నిర్మించారు. ఆలయం 125 అడుగుల ఎత్తులో ‘9’ గోపురాలుతో కట్టబడింది.

4. సోమారామము

పంచరామాల్లో నాల్గవదైన “సోమారామము”. పశ్చిమ గోదావరి జిల్లాలోని భీమవరానికి రెండు కిలోమిటర్లు దూరంలో గల గునిపూడిలో కలదు. ఇక్కడ స్వామి వారిని “సోమేశ్వరుడు” అని పిలుస్తారు. ఇచ్చట ‘శివలింగానికి’ ఒక ప్రత్యేకత ఉంది. మాములు రోజుల్లో తెలుపు రంగులో ఉండే ‘శివలింగం’, అమావాస్య రోజు వచ్చేసరికి గోధుమ రంగులోనికి మారుతుంది. తిరిగి పౌర్ణమి వచ్చేసరికి యధాస్ధానానికి చేరుతుంది.ఇక్కడ స్వామిని ‘చంద్రుడు’ ప్రతిష్టించాడు. చంద్రునిచే ప్రతిష్ఠించ బడినది కావున దీనికి ‘సోమారామము’ అని పేరు వచ్చింది.

5. కుమారభీమారామము

పంచారామాల్లో చివరిది, 5వది అయిన ‘కుమారభీమారామము’, తూర్పుగోదావరి జిల్లాలోని సామర్లకోటకు కిలోమిటరు దూరంలో కలదు. ఇక్కడ స్వామిని “కాల బైరవుడు” అని పిలుస్తారు.ఈ ఆలయాన్ని దాక్షారామాన్ని నిర్మించిన, చాళుక్య రాజయిన భీముడు ఈ ఆలయాన్ని కూడా నిర్మించాడు.

మరికొన్ని ప్రత్యేక కథనాలు…

శ్రావణ మాస పవిత్రత గురించి తెలుసుకుందాం