భారత్ సమాచార్, జాతీయం ; ప్రతిరోజూ న్యూస్ పేపర్ లో ఎక్కడో ఒక చోట చెక్ బౌన్స్ కేసు నమోదు అనే శీర్షికతో వార్తను చూస్తూనే ఉంటాం. యూపీఐ నగదు లావాదేవీలు అందరికి అందుబాటులోకి వచ్చిన తర్వాత ఈ కేసుల పంచాయితీలు కొంచెం తగ్గాయి అని చెప్పవచ్చు. కానీ ఇప్పుడు కూడా చెక్కుల వినియోగం భారీగానే ఉంది. పెద్ద మొత్తంలో డబ్బు లావాదేవీలకు చెక్కులను వాడాల్సి రావటం దీనికి కారణం. ఇప్పటికి చాలా సందర్భాల్లో చెక్ బౌన్స్ వార్తల కేసులు తెర పైకి వస్తున్నాయి. ఇలాంటి సమయంలో దీనికి సంబంధించిన రూల్స్ తెలుసుకోవటం తప్పని సరి.
జరిమానా-శిక్ష కూడా…
చెల్లింపుల్లో భాగంగా ఇతరులకు ఇచ్చిన చెక్ బౌన్స్ అయితే జరిమానా చెల్లించాల్సి ఉంటుంది. అంతేకాక కొన్నిసార్లు జైలుకు కూడా వెళ్లాల్సి రావచ్చు. అనేక సార్లు ఇదే తప్పులను మళ్లీ చేస్తే బ్యాంక్ మీ చెక్ బుక్ సౌకర్యాన్ని నిలిపివేసే ప్రమాదం కూడా ఉంది. ఈ కారణాలతో ఒక్కోసారి సదరు వ్యక్తి బ్యాంక్ ఖాతాను శాశ్వతంగా మూసివేయటానికి దారి తీస్తాయి.
చెక్ బౌన్స్ కు గల కారణాలు..
చెక్ బౌన్స్ కావటానికి ఒకటి కంటే ఎక్కువ కారణాలు ఉండే అవకాశం ఉంది. వీటిలో ముఖ్యమైన కారణం మీ బ్యాంకు ఖాతాలో ఇచ్చిన చెక్ కంటే తక్కువ బ్యాలెన్స్ ఉండడం. ఇతర బ్యాంకు ఖాతాలు, చెక్కులపై పెట్టిన సంతకాలు కూడా ఒక కారణం కావచ్చు. వీటికి తోడు చెక్కుపై పొందుపరిచిన నంబర్ సరిగ్గా లేకపోయినా చెక్కు బౌన్స్ అయ్యే అవకాశం ఉంది. అలాగే చెక్ పాడైనట్లయితే సదరు బ్యాంక్ దానిని క్లియర్ చేయదని గుర్తుంచుకోవాలి.
చెక్ బౌన్స్ అయితే ఏంటి..?
చెక్ బౌన్స్ అయినప్పుడు బ్యాంక్ సదరు ఖాతాదారునిపై జరిమానా విధిస్తుందన్న విషయం మనందరికీ తెలిసిందే. అయితే ఆ పెనాల్టీ మొత్తం బ్యాంక్, బౌన్స్ కు కారణాలపై ఆధారపడి ఉంటుంది. ఖాతాలో తక్కువ బ్యాలెన్స్ కారణంగా చెక్ బౌన్స్ అయితే.. అది క్రిమినల్ కేటగిరీ కిందకు వస్తుంది. నెగోషియబుల్ ఇన్స్ట్రుమెంట్స్ యాక్ట్ కింద చర్యలు ఉంటాయి. కొన్ని సందర్భాల్లో రెండు సంవత్సరాల వరకు బ్యాంకు ఖాతా దారుడికి జైలు శిక్ష కూడా పడే ప్రమాదం ఉంటుంది. దీనికి సంబంధించి కొన్నిసార్లు లీగల్ నోటీసులు ఎదుర్కొవాల్సి ఉంటుంది.
తీసుకోవాల్సిన జాగ్రత్తలు…
ఎవరికైనా చెక్కు జారీ చేసేటప్పుడు బ్యాంకు ఖాతాలో తగిన మొత్తంగా నగదు ఉందో లేదో సరి చూసుకోవాలి. రెండవ ముఖ్యమైన విషయం ఏమిటంటే బ్యాంకులో పొందుపరిచిన విధంగానే సంతకాన్ని సదరు చెక్కుపై పెట్టారో లేదో కచ్చితంగా సరిచూసుకోవాలి. చెక్కుపై నింపిన వివరాలు సమాచారాన్ని జాగ్రత్తగా ఎటువంటి తప్పులు లేకుండా నమోదు చేసుకోవాలి.
